حازم إيهاب: منة أقنعتني بالزواج.. ولو أجهضنا طفلنا كنت سأعيش في صراع

كشف الفنان المصري حازم إيهاب، عن التجارب الصعبة التي مر بها بعد وفاة والدته ونجله، والتعب الذي عاشته زوجته، مشيرا إلى أن هذه اللحظات غيّرت فيه الكثير من الأمور.

وقال إيهاب في تصريحات تلفزيونية: "الفقدان غيّر جوايا حاجات كتير، وساعدني ألاقي مشاعر مكنتش لاقي ليها إجابات وإجابات ماكنتش لاقي ليها ردود وعرفتها مع الوقت، وكل اللي متأكد منه أن كل حاجة بتحصل لنا في حياتنا خير ولو دورنا على أحسن سيناريو هيكون هو ده، رغم من أنه ممكن يكون أصعب سيناريو".

وأكد إيهاب أنه أصر على إنجاب ابنه على الرغم من أن الأطباء أخبروه بأنه من الصعب شفاؤه ونصحوه وزوجته بإجهاضه، معلقا: "كنت عارف إن ابني تعبان من قبل الولادة لكن صممت إني أكمل لإني كنت مقتنع إن مهما احنا عملنا هو مفيش أي دليل إن هو يفضل كده أو يخف واليقين إن كان في أمل".

وأضاف: "كان عندي مبدأ بقوله لمنة أنا مش عايز أدخل في صراع إني أسقطه وأقول لو كنت استنينا وربنا عمل معجزة وكان هيطاردني طول حياتي وكان هيبقى صراع هيطاردني ومكنتش هلاقي رد على السؤال ده وفكرة إني أكمل المشوار لآخره عشان كنت مسلم إيرادتي لربنا".

زواجه

ووصف إيهاب زوجته منة داغر "بأجمل ما حدث في حياته"، مشيرا إلى أنه كان يستبعد فكرة الزواج، لكنها هي غيرته، وجعلته ينظر للحياة بطريقة مختلفة.

وأضاف معربا عن حبه العميق لزوجته: "بتجوز عيلة مش واحدة وهي أهلها كويسين جدا ومامتها علمتني حاجات كتير في حياتي".

بداياته

كما تطرق إيهاب للحديث عن بداياته الفنية: "زمان كنت بقول لصحابي أنا أول ما انزل مصر همثل واللي حببني في التمثيل أنا من وأنا صغير بحب اهزر ومش بتكسف ومكنتش عامل خطة لأي حاجة والنية والسعي هما السبب حتى لو بالعشوائية".

وأشار إلى أنه منذ صغر سنه كان يعيش لحظة استلام جائزة أفضل ممثل: "لما كنت في الكويت كنت بقعد اختبر نفسي وأنا صغير قدام المرايا وأعلم نفسي بستلم جايزة أحسن ممثل واعيش في المود لدرجة إني كنت بعيط".

دراسته

وحول دراسته الجامعية، تحدث إيهاب: "بابا مكنش عايزني ادخل معهد فنون مسرحية وقالي ادخل جامعة عادية وبعدين ادخل ودخلت جامعة المستقبل عشان هي أقرب حاجة للبيت ومكنتش بحب فكرة المذاكرة ولما اخترت الجامعة دخلت أقرب جامعة ودخلت بيزنس وقعدت فيها 8 سنين".

وأكد أن دخوله إلى المسرح جعله يتراجع في دراسته: "استاذ خالد جلال كان بيدي ورش في جامعة المستقبل ودخلت مسرح وقولته أنا عايز اتعلم ومن أول ما دخلت كنت بنجح وبجيب تقدير، وبعد ما دخلت المسرح مكنتش مركز في التعلم، ودخلت الجامعة 2014 واتخرجت السنة اللي فاتت".