تامر حسني لمنتقدي فيلم "تاج": لجان مأجورة..

رد الفنان المصري تامر حسني على منتقدي فيلمه "تاج"، الذي يعرض حاليًا في السينما بشأن اتهامه بتزوير أرقام إيرادته، ووصفهم بأنهم "لجان مأجورة"، موجها شكره للإعلامية ياسمين عز بعد دفاعها عنه.

ودون حسني رسالة طويلة عبر الستوري في إنستغرام جاء فيها: "زمن غريب والله بنلوم المجتهد اللي بيألف وبيخرج وسايبين الكسلان وضعاف النفوس يكفيني شرفًا أن فيلم بحبك صاحب أعلى إيرادات في تاريخ السينما العربية دوليًا".

وأضاف: "فيلم تاج تم بيعه بنجم شباك 1 مش تجميعة نجوم، ودي حاجة تحسب للفيلم وبعملها كل سنة الحمدلله، وکونه نوع جديد للسينما العربية يحسب للفيلم برضه، الفيلم الحمد لله تم توزيعه النهاردة عالميًا أكيد دي حاجات بتزعل بعض ضعاف النفوس.. ولكن واقعها على الناس العقلاء جميلة اللي بيتمنوا الخير لابن بلدهم اللي حاجة زي كده بتشجعهم إن مفيش مستحيل ولا يمكن نبقى حافظين مش فاهمين".

وتابع تامر حسني: "أحب أطمنك يا ياسمين (الإعلامية المصرية ياسمين عز) إنه لا يصح إلا الصحيح وخلي بالك الجمهور ذكي جدًا ويمكن بسبب الحملات الساذجة دي الجمهور زاد طلبه على الفيلم لإن الحملات زادت فضول الناس إنها تروح الفيلم عشان تحكم بنفسها، ولما راحوا عجبهم الفيلم بدليل إيراداته الضخمة".

كما أوضح: "لو جبت أهم شركات في العالم عشان يقدموا فكرة بالذكاء ده عشان أعمل دعاية لفيلمي مكانوش هيوصلوا لربع المفعول الإيجابي اللي عملوه الحملات واللجان المأجورة في إثارة فضول الناس إنها تروح تشوف الفيلم والله مفعولهم مردودة أقوى من الدعاية اللي بندفع فيها فلوس".

واختتم تامر حسني رسالته قائلا: "بالمرة نشيل من على شركة الإنتاج باند الدعاية عشان مكلف أوي بصراحة ونسيبه على المغيوظين هما يدفعوه ربنا ما يقطعلهم عادة أحب أفرحك أكتر يا ياسمين فيلمي اللي جاي تصويري كمان، شكرًا لدفاعك عن الحق يا أحلى ياسمين".

فيلم "تاج"

ويُجسد حسني في الفيلم شخصية "سوبر هيرو". ويظهر مع كل من دينا الشربيني، وبيومي فؤاد، وتدور أحداثه في إطار اجتماعي يمزج بين الواقع والخيال، وهو تأليف تامر حسني، وإخراج سارة وفيق، في ثاني تعاون لها مع تامر حسني بعد فيلم "مش أنا".